कविता वाचन @ किताबखाना

हॉलमधील दहशतवादी थंडीत

मी एक कवी दहशतग्रस्त

जगातला कोणता कवी

नसतो दहशतग्रस्तच्या एकमेव उबेमुळे

जाऊ धजलेला कविता वाचण्यासाठी

लटपटणारे पाय

घामेजलेले हात

घशाला कोरड

कोणत्या भाषेत सांगू आयोजिकेला

पाण्यासाठीची ओरड

कपातल्या कपात थंड केलेली

गरम कॉफी

कुरकुरीतपणा काढून घेतलेली बिस्किटं

सुरकुतलेल्या गालांतून

सांडेल न सांडेलसं हसू

गिळतो कवी

खिशातल्या सभ्य रुमालाने खिशातच

टिपतो गंभीर ओठ

आयोजिकेच्या साखरघोळल्या ओठांची हालचाल

फाsssय मिनित्स मोSSS

अँद विल स्ताSSSट द सेशन

टिल देन यू कॅSSSन एक्सचेंSSSज

यूओ थॉटस विथीचदरSSS

आयोजिका अनभिज्ञ

उगाच्च्या उगाच वाट बघितली

की कवीच्या पोटात कळ मारतेच्या

ग्राऊंड रियालिटीला

अवांतर थंडीने आणखी वाढते कळ

चकाचक वॉशरुमात

कवीची दहशतमुक्तीसाठी यातायात

निष्फळ

लेत्स स्टाSSSट ची साम्राज्यवादी अनौन्समेंट

निमंत्रित असल्याने

एकूण तीन रांगांपैकी पहिल्या रांगेत

कवी स्थानापन्न

डाव्या पायावर उजव्या पायाचा

आत्मविश्वास टाकून कवी

कोपर्‍यातल्या अनुभवी कवीसारखाच

आपला सर्जनशील हात

विचारवंत गालफडांवर टेकतो

कार्यक्रम संपेपर्यंत मग

दोन्ही कवी मिळून करून टाकतात

पुनर्वसन

बेचिराख पॅलेष्टाइनचं