प्रिय प्रोफाइलधारकांनो,

वाचकांनो, न-वाचकांनो, वाचकासारखे दिसणाऱ्यांनो,

न-वाचकासारखे दिसणाऱ्यांनो, वाचनवेड्यांनो,

वाचून वाचल्यासारखे करणाऱ्यांनो, वाचून न

वाचल्यासारखे करणाऱ्यांनो, न वाचून न वाचल्यासारखे

करणाऱ्यांनो, न वाचून वाचल्यासारखे करणाऱ्यांनो,

वाचून लाईकणाऱ्यांनो, न वाचून

लाईकणाऱ्यांनो, वाचून न लाईकणाऱ्यांनो,

न वाचून न लाईकणाऱ्यांनो, वाचून कमेंटणाऱ्यांनो,

न वाचून कमेंटणाऱ्यांनो, वाचून न कमेंटणाऱ्यांनो,

न वाचून न कमेंटणाऱ्यांनो, शेयरणाऱ्यांनो, पोस्ट्णाऱ्यांनो,

रोज पोस्ट्णाऱ्यांनो, अधूनमधून पोस्ट्णाऱ्यांनो,

मनातल्या मनात पोस्ट्णाऱ्यांनो, न पोस्ट्णाऱ्यांनो,

अंगठा कापून देणाऱ्यांनो, अंगठ्याच्या बदल्यात

अंगठा देणाऱ्यांनो, अंगठा मिळेलच्या अपेक्षेने

अंगठा देणाऱ्यांनो, अंगुठाबाज भाटांनो, अंगुठाबाज

लाळघोटयांनो, अंगठा शाबूत ठेवलेल्यांनो,

सेल्फीबहाद्दरांनो, फोटोबहाद्दरांनो, पाउटबहाद्दरिंनो,

माहीतगार प्रोफाईलधारकांनो, भाष्यकार प्रोफाईलधारकांनो,

प्रतिक्रियाकार प्रोफाईलधारकांनो, विद्वान प्रोफाइलधारकांनो,

सर्वकाही माहीत असणाऱ्यांनो, सर्वकाही माहीत न असणाऱ्यांनो,

आपण जे नाहीहोत ते भासवणाऱ्यांनो, आपण जे आहोत ते

लपविणाऱ्यांनो, आपण जे आहोत ते असणाऱ्यांनो,

चोळया हातांनो, लाळ्या जिभांनो,

हॅशटॅगच्या वाहत्या प्रवाहात हात धुवून घेणाऱ्यांनो,

सक्काळसक्काळी कावळा येऊन बसतो डोक्यावर
जणूकाही मी फांदीये झाडाची

कावकाव करतो कानात
जा ना तुझ्या रानात
माझं डोकं का खातोस

मी फांदी नाहीये
झाडतोड्या आहे
ज्याला तुझी गोष्ट ऐकू येत नसते

मी कधी स्पर्श केला नाही झाडाला.

कधी पाणी नाही घातलं बुडाशी.

कधी बघितलं नाही बारकाईने

की कसं एका बीमधून उगवून आलं रोप

आणि मुळावत गेलं घट्ट मातीत

आणि झेपावत गेलं आकाशात.

कधी कौतुक केलं नाही हिरव्या रंगाचं.

फॉरेस्ट ग्रीन उठून दिसेल भिंतीला,

बायको म्हणाली. तसं केलं.

आरामखुर्चीत बसून भर दुपारी

उन्हाची कल्पना करत भिंतीच्या सावलीत

गार बसलो.

दाह कमी नाही झाला.

तहानेने घसा कोरडा झाला.

आरोचं पाणी प्यायलो.

मी कधी पाण्याला स्पर्श नाही केला.

खिडकी असण्याची जवळपास

शक्यता असणार्‍या या चौकटीतून

मी पाहतोय बाहेरच्या शक्यतेत

बाहेरच्या शक्यतेत मी पाहतोय

आकाश असण्याची जवळपास

शक्यता असणा­र्‍या आकाशाच्या दिशेने

मला जो दिसतोय

कदाचित निळा रंग

ढग असण्याची शक्यता असणा­र्‍या

पांढ­या पुंजक्यांच्या मागे

तोच आहे का आकाशाचा रंग

मला जे दिसतेय

कदाचित घुमटासारखे गोल छत

क्षितीज असण्याच्या दाट शक्यतेपर्यंत

खोलवर उतरलेलं

तसाच्च्या तस्सा आहे का आकार आकाशाचा

हे जे चार आकडयांचे कदाचित पक्षी

उंडारताहेत पंख पसरून

तीच आहे का आकाशाची अथांगता

चांदणे असण्याची दाट शक्यता

असलेले हे अगणित शब्द कुजबुजताहेत

तोच आहे का नेमका

माझ्या आकाशाचा अर्थ

समोरच्या खिडकीतून पाहणा­र्‍याला

मी विचारला आकाशाचा अर्थ

तर तो म्हणाला

खिडकी असण्याची शक्यता असणार्‍या

चौकटीएवढं निव्वळ धुकं

टक्क उघडे डोळे
स्वर्गगामी

तुला अडकवून ठेवलं आम्ही
ब्लॅकग्रॅनाईट भिंतीवर
बापाची उजवी बाजू
तेव्हापासून रिकामीच आहे